ဗုဒ္ဓဘာသာ အပိုင်း( ၃ )

ဗုဒ္ဓဘာသာ အပိုင်း( ၃ )



( စကားဦး ) ဗုဒ္ဓဘာသာဝင်တိုင်း လေ့လာဆည်းပူးသင့်သော(ဗုဒ္ဓ၀င် - မြတ်စွာဘုရား အတ္ထုပ္ပတ္တိ ) ကို

ကျွန်ုပ်ရေး၍ ပို့စ်တင်သောအခါ မြန်မာနိုင်ငံတွင်း၌ ရှိကြသော စာဖတ်သူအချို့နှင့် ကမ္ဘာအရပ်ရပ်နိုင်ငံများတွင် ရောက်ရှိ

နေကြသော ဗုဒ္ဓဘာသာအပေါင်းတို့၏ အမျိုးမျိုးသော ဝေဖန်မှု အကြံပြုမှု ချီးမွန်း ကဲ့ရဲ့ ပြစ်တင်ရှုံ့ချမှုတို့ကို တချိန်တည်း

လက်ခံရရှိပါသည် ။ နိန္ဒာ ပသံသာ ၊ ချီးမွန်းခြင်း ကဲ့ရဲ့ခြင်းထိုနှစ်မျိုးလုံးကို ခံနိုင်ရည်ရှိအောင် အလေ့အကျင့်ပြုပြီးမှ

ကျွန်ုပ် ရေးခဲ့ခြင်းဖြစ်သည့်အတွက် ကျွန်ုပ်၌ ခံနိုင်ရည်ရှိပါသည် ။ ထို့ပြင်" ခန္တီ ပရမံတပ္ပေါတိတိက္ခာ" ဟူသော

မြတ်သောအကျင့်ကိုနှလုံးသွင်းထားသည့်အတွက်ကြောင့် မည်သို့ပင်ဝေဖန်စေကာမူ ကျွန်ုပ် မတုန်လှုပ်မိပါချေ ။

ကျွန်ုပ်၏ စကားဦး၌ ပါသော ( ယ္ခုရေးသော ဗုဒ္ဓဘာသာ အခန်းဆက်နှင့် နောင်လာမည့်အခန်း(အပိုင်း)

များအားလုံးသည် ၊ စာအုပ်တစ်အုပ်အတွင်းမှ ကူးချသောစာများမဟုတ်ပါ

ဘာသာရေးစာပေ ဖြစ်သည့်အတွက် ကျမ်းအစောင်စောင် ပေအမျိုးမျိုး လူပညာရှိ ရဟန်းပညာရှိများ

အသီးသီး၏ မူကွဲ ၀ါဒကွဲတို့ကို ညှိနှိုင်းပြီးမှ ပြန်လည်ရေးသားရခြင်းဖြစ်သည့်အတွက်

တခန်းပြီးတခန်းကျမ်းကိုးကျမ်းကားမဖော်ပြနိုင်သေးပါ ။

အခန်းအားလုံးပြီးလျှင် ကျမ်းညွှန်းနှင့်တကွ ဖော်ပြပေးပါမည် ။

ဘာသာရေးစာပေသည် သာမန်အထောက်အထားတခုတလေနှင့်မပြည့်စုံပါ

ကေစိဝါဒ ၊နာနာကဒါစိဝါဒ ၊ အာစရိယ ပရမ္ပရ၀ါဒ မိမိ၏ အတ္ထနောမတိတို့နှင့်ပါပေါင်းစပ်ရေးသားရပါသဖြင့်

အလုံးစုံပြီးသောအခါ ကျမ်းညွှန်းပေးပါမည် ။) အတ္ထနောမတိ (၀ါ) မိမိ၏ အယူအဆ ၊ ကိုယ်ပိုင်အတွေးအခေါ်ဟူသည်ကို

အနည်းငယ်ရှင်းပါမည် ။ ဗုဒ္ဓစာပေတွင် ပါဠိ အဌကထာ ၊ ဋိကာ အစရှိသဖြင့်ရှိပါသည် ၊ဗုဒ္ဓ၏နှုတ်မြွတ်တော်ဖြစ်သော

ပါဠိသက်သက်ဖြင့်ဖော်ပြရေးသားသော် ပါဠိမသိသူများအဘို့ နားလည်မည်မဟုတ်ပါ ၊ ထိုသောအခါနားလည်သိရှိ

သော ပါဠိကျမ်းတက်ပုဂ္ဂိုလ်များမှ နားလည်သောဘာသာစကားဖြင့် ဘာသာပြန်ကြရပါသည် ၊ ထိုသည်မှာ ဘာသာပြန်

သူ၏ အတ္ထနောမတိပင် မဟုတ်ပေလော ၊ တဖန် ဗုဒ္ဓ၀င်ကျမ်းများကိုရေးခဲ့ကြသော ကျမ်းပြုအကျော် ကျေးဇူးတော်ရှင်

ကြီးသဲ လေးထပ်ဆရာတော်ဘုရား ၊ မင်းကွန်းတိပိဋက ဆရာတော်ဘုရားတို့ခေတ် မြန်မာစာပေအရေးအသားအခေါ်

အဝေါ်နှင့် ယ္ခုခေတ် စာပေအရေးအသားအခေါ်အဝေါ်ခြင်း မတူတော့သည်ကို စာဖတ်သူများ သိမည်ဖြစ်ပါသည် ။

ထိုသို့ မတူညီသော မြန်မာစာပေအဆင့်ဆင့် ပြောင်းလည်းမှုတို့ကို ခေတ်နှင့်အညီ မူရင်းစာရေးသူများ၏ လိုရင်း

အဓိပ္ပါယ် မြတ်စွာဘုရား၏ ပိဋကတ်တော်နှင့်လည်းမဆန့်ကျင်အောင် ယ္ခုခေတ်စာဖတ်သူများလည်းအလွယ်တကူ

သဘောပေါက်နားလည်အောင် စာရေးသူတို့၏အတက်ပညာနှင့် ချယ်မှုန်းရခြင်းသည် အတ္ထနောမတိဟုခေါ်သော

မိမိ၏အယူအဆပင်မဟုတ်လော ။ ကျွန်ုပ်ပြောလိုသော အတ္ထနောမတိ (မိမိအယူအဆ တွေးခေါ်မှု) ဆိုသည်မှာ

ထိုကဲ့သို့မျိုးဖြစ်ပါသည် ။ စာဖတ်သူအပေါင်းအားလေးမြတ်စွာ ၀န်ခံလိုသည်မှာ ကျွန်ုပ်ညီသုတသည် ကျမ်းတက်

အကျော် ပညာရှိက၀ိတစ်ဆူမဟုတ်ပါ ငယ်ရွယ်နုပျိုသော လူငယ်တယောက် လူသားတယောက်မှ ဘာသာရေးအသိ

စိတ်ကြောင့် ဤမျှ ကြီးကျယ်ခန်းနားသော ဗုဒ္ဓ၀င်တော်များကို လက်လှမ်းမှီသလောက် စာဖတ်သူများနှင့်မိတ်ဆက်ပေး

သူသာဖြစ်ပါသည် ။ ကမ္ဘာအရပ်ရပ်ရှိ နိုင်ငံအသီးသီးမှ မက်ဆေ့ခ်ျပို့၍ ဝေဖန်ကဲ့ရဲ့သူများနှင့် ချီးမွန်းထောပနာပြု သာဓုပေးကြသော

ပုဂ္ဂိုလ်အပေါင်းအား ဤ (စကားဦး)ဖြင့် ကျေးဇူးတင်ဝမ်းမြောက်ပါကြောင်း ပြန်ကြားပေးပါသည် တမုံ့.......။



" ကြည့်ခြင်းကြီးငါးပါးကို ကြည့်တော်မူခြင်း "

ကြည့်ဟန်ကား -

(၁) လူတို့အသက် အသင်္ချေမှသည် တစ်သိန်းတမ်း၏အထက် တိုင်သောကာလသည် ဇာတိ ၊ ဇရာ ၊ ဗျာဓိ ၊

မရဏ တို့ ကာလကွာဝေး၍ လက္ခဏာရေးသုံးပါးနှင့်စပ်သော တရားစကားကိုဟောပြငြားသော်လည်း တရားကိုမယုံကြည်

ပေရာ ၊ အကျိုးမဲ့သာဖြစ်မည်ကြောင့် မြတ်စွာဘုရားတို့ ပွင့်ထိုက်သောကာလမဟုတ်ချေ ။ လူတို့အသက်တစ်ရာမှ ဆုပ်ယုတ်

သောအခါတွင်လည်း သတ္တ၀ါတို့သည် ကိလေသာ ပြန့်ပြော၍ လောဘ ၊ ဒေါသ ၊ မောဟ တရားများပြားသောကြောင့် ဆုံး

မဟောကြားသော တရားဒေသနာတော်ကိုလိုက်နာ၍ မကျင့်လိုကုန် ၊ အကျိုးမဲ့သာဖြစ်လေရာသောကြောင့် မြတ်စွာဘုရားတို့

မပွင့်ကုန် ။ အသက်တစ်သိန်းမှသည် တစ်ရာတမ်းတိုင်ရုံသော ကာလသည်သာလျှင် ဘုရားဖြစ်ထိုက်သော ပွင့်ထိုက်သော

အခါဖြစ်သည် ။ယ္ခုလည်း လူတို့အသက် တစ်ရာရှည်သောအခါ ဖြစ်၍ ဘုရားဖြစ်ခြင်းငှာ( ပွင့်ခြင်းငှာ) သင့်ပေသည် ။

(၂) ဘုရားဖြစ်ရာ ဒီပ(ကျွန်း - အရပ် ) လည်း အကျယ်အားဖြင့် ယူဇနာ တစ်သန်းနှစ်သိန်း သုံးထောင် လေးရာ့

ငါးဆယ် (၁၂၀၃၄၅၀) ကျယ်ဝန်းသော စကြာဝဠာ၏ အတွင်း၌ ကျွန်းငယ်ပေါင်း ငါးရာစီ ငါးရာစီ ချန်ရံလျှက် လေးရပ်

သော ဒီပတွင်(အရပ်လေးမျက်နှာ) မြင်းမိုရ်တောင်မှ လက်ယာဝယ် ယူဇနာတစ်သောင်းရှိသော ဇမ္ဗူဒိပ်ကျွန်းသည်သာ

မြတ်စွာဘုရားတို့ ပွင့်ရာအရပ်ဖြစ်သည် ။

(၃) ထိုဇမ္ဗူဒိပ်ကျွန်းတွင်မှလည်း တောနေသုံးထောင် ၊ ရေနေလေးထောင် ၊ လူနေသုံးထောင် ရှိသည်တွင်

လူနေသုံးထောင်၏ အလယ်၌ တောင်မြောက်အလျား ယူဇနာသုံးရာ ၊ အရှေ့အနောက် အနံအားဖြင့် ယူဇနာနှစ်ရာ့ငါးဆယ်

အ၀န်း ယူဇနာ ကိုးရာရှိသော အရှေ့သို့သွားသော် ဂဇင်္ဂလနိဂုံး ၊ အရှေ့တောင်သို့သွားသော် သလ္လ၀တီမြစ် ၊ တောင်ဘက်သို့

သွားသော် သေတကဏ္ဏိကနိဂုံးရွာ ၊ အနောက်သို့သွားသော် ထူဏမည်သော ပုဏ္ဏားရွာ ၊ မြောက်အရပ်သို့သွားသော် ဥသီရဒ္ဓ

ဇတောင် ဤနိမိတ် ငါးရပ်တို့ဖြင့် သတ်မှတ်အပ်သော မဇ္ဈိမဒေသ အရပ်၌သာလျှင် ဘုရားအဆူဆူတို့ ပွင့်ရာအရပ်ဖြစ်သည် ။

( ၄) လူမျိုးလေးပါးတို့တို့တွင်လည်း မင်း ပုဏ္ဏားမျိုးတို့သည် လူတို့ လေးစားကိုးကွယ်ရိုသေရာဖြစ်၍ ဤနှစ်

မျိုးတို့၌သာ ဘုရားရှင်တို့ဖြစ်ကြကုန်သည် ။ ထိုအမျိုးနှစ်စုတို့တွင်လည်း ယခုအခါ မင်းမျိုးသာလျှင် သင့်မြတ်ချေသည် ။

ထိုမင်းမျိုးတို့တွင်လည်း သက္ကတိုင်းကပိလ၀တ်ပြည်ကိုအစိုးရသော သုဒ္ဓေါဓနမင်းကြီးသည် မဟာသမ္မတမင်းမှစ၍ သုံးသိန်း

သုံးသောင်း လေးထောင်ငါးရာ ခြောက်ကျိပ်ခုနှစ်ပါးသော ဥက္ကာဝံသ မဟာဝံသ အသမ္ဘိန္န ခတ္တိယအစစ်ဖြစ်ပေသည် ။

(၅) ထိုမင်း၏ မိဖုရားသည်လည်း လော်လည်ခြင်းငါးပါး ၊ ရန်မူခြင်းကိုးပါး အယုတ်တရားတို့မှကင်းလျက်

မကျိုးမပျက်သော ငါးပါးသီလရှိရကား ငါ့အမိဖြစ်ခြင်းငှာထိုက်၏ ။ အာယုပရိစ္ဆေဒ(အသက်အပိုင်းအခြား)လည်း ဆယ်လ၏

အထက်၌ ခုနှစ်ရက်သာကြွင်းတော့သည် ။

ထိုကဲ့သို့ ကြည့်တော်မူ၍ ပြည့်စုံစွာမြင်လေလျှင် နေရပ်အသီးသီးမှတောင်းပန်ကြသော နတ် ၊ ဗြဟ္မာအပေါင်းတို

အား ကောင်းပြီဟု ၀န်ခံတော်မူသည် (ဘုရားဖြစ်ရန်လက်ခံတော်မူသည်) ။

" ဘုရားလောင်း ပဋိသန္ဓေ နေတော်မူခြင်း "

ဘုရားဖြစ်ရန်ဝန်ခံပြီးမှ နတ်အပေါင်းခြံရံလျက် နန္ဒ၀န် အမည်ရှိသော နတ်ဥယျာဉ်သို့ဝင်၍စုတေခဲ့ပြီးသော်

အကျယ်အ၀န်းကိုးရာရှိသော မဇ္ဈိမဒေသအချက် သက္ကတိုင်း ကပိလ၀တ်ပြည် အာဒိစ္စ၀င်မင်းဖြစ်သော သိရီသုဒ္ဓေါဒန မိဖုရား

ခေါင်တောင်ညာစံဒေ၀ီဖြစ်သော သိရီမဟာမာယာ မိဖုရားကြီး၏ ၀မ်း၌ ပဋိသန္ဓေတည်နေတော်မူသည် ။

ပဋိသန္ဓေယူသောနေ့မှာ မဟာသက္ကရာဇ် ခြောက်ဆယ့်ခုနစ်ခု ၀ါဆိုလပြည့် ကြာသပတေးနေ့ ဥတ္တရာသာဠ်

နက္ခတ်နှင့် လနတ်ယှဉ်စံသော သန်းခေါင်ယံ အချိန်တွင် ပဋိသန္ဓေယူတော်မူသည် ။

ဆက်ရန်.......

ညီသုတ(ပြည်)

27/4/2012

16း45

pyay.

Tags: ကိုယ်ပိုင်ဘလော့